कालिका मन्दिरमा साउनको आय ६८ लाख

राजेशचन्द्र राजभण्डारी

कालिका भगवती गुठी व्यवस्थापन समिति, बागलुङले साउन महिनाको आय–व्यय विवरण सार्वजनिक गरेको छ। कालीका भगवती गुठिका अध्यक्ष कुमार खड्काको अध्यक्षतामा बसेको बैठकले हिसाबकिताब सार्वजनिक गरेको हो । सार्वजनिक गरेको विवरण अनुसार सो महिनामा गुठीले विभिन्न शीर्षकहरूबाट जम्मा ६८ लाख ३१ हजार १ सय ७० रुपैयाँ आम्दानी गरेको छ भने खर्चतर्फ १५ लाख २३ हजार १०० रुपैयाँ खर्च गरेको छ।

आम्दानीतर्फ सबैभन्दा ठूलो योगदान भाडाबाट आएको छ, जसको रकम ५९ लाख १ हजार ६४० रुपैयाँ रहेको छ । त्यस्तै भेटीबाट ६ लाख ८८ हजार ७८५ रुपैयाँ संकलन गरिएको छ । अन्य आम्दानी स्रोतहरूमा विवाह कार्यक्रम, आर्थिक सहयोग, चामल, बोका–बाख्रा लगायत रहेका छन्। खर्चतर्फ १५ लाख २३ हजार १०० रूपैयाँ मध्य तलबमा ४ लाख ९ हजार, पुर्वाधार विकास तथा निर्माणमा ९ लाख ३१ हजार ७००,अतिथि सत्कार ५१ हजार बिजुली बत्ती लगायतका शीर्षकमा रकम खर्च गरिएको गुठीले जनाएको छ ।

कालिका भगवती गुठीले साउन महिनामा ६८ लाख ३१ हजार १७० रूपैयाँ आम्दानी १५ लाख २३ हजार १०० खर्च कट्टा गरि ५३ लाख ८० हजार ७० रूपैयाँ बचत गरेको गुठीले जनाएको छ । कालीका भगवती गुठीले हरेक महिनाको पहिलो साता मन्दिरको आम्दानी खर्चको हिसाबकिताब सार्वजनिक गर्दै आएको छ ।