विश्वभर फैलिएको कोरोना भाईरस (कोभिड–१९) विरुद्धको नागरिकलाई खोप लगाउने अभियान बागलुङमा तीब्र बनाईएको छ । स्वास्थ्य कार्यालय बागलुङका अनुसार मंगलबारसम्म ५१ हजार ६ सय २३ नागरिकले कोरोना विरुद्धको खोप लगाई सकेका छन । जिल्लामा कुल ७६ हजार ८ सय ५५ खोप आएकोमा ५९ हजार ३ सय ६६ डोज खर्च भएको छ । जसमा खोप प्राप्त गरेका ५१ हजार ६ सय २३ नागरिक रहेको कार्यालयका खोप सुपरभाईजर राजु खत्रीले जानकारी दिए ।
जसमा कोभिडशिल्ड खोप दुई डोज नै लगाएका १८ हजार ९ सय ८७ रहेका छन् भने पहिलो मात्रै लगाएका १४ हजार ५ सय ४० जनालाई दोस्रो डोज खोप लगाउन बाँकी रहेको छ । त्यसैगरी २२ हजार ८ सय ५२ ले भेरोसेल पहिलो लगाएका छन् भने १८ हजार ९ सय ८२ ले दोस्रो डोज लगाउन बाँकी रहेको छ ।
जिल्लामा पछिल्लो समय आएको अमेरिकन खोप जोन्सोन एण्ड जोन्सोन १२ हजार ६० डोज आएको थियो । जसमा १० हजार ६ सय ३४ जना नागरिकले लगाई सकेको खत्रीले बताए । जिल्लामा १८ वर्ष भन्दा माथिका झण्डै १ लाख नागरिक खोप लगाउन बाँकी रहेको स्वास्थ्य कार्यालयले जनाएको छ ।
१४ हजार नागरिक कोभिशिल्डको दोस्रो डोज लगाउन बाँकी
भारतबाट नेपालमै पहिलो पटक भित्रिएको कोभिशिल्ड खोप पछिल्लो समय आयात नुहँदा १४ हजार नागरिकलाई दोस्रो डोज लगाउन बाँकी रहेको छ । उक्त खोप केही मात्रामा भित्रिने र एस्ट्राजेनेका खोपलाई दोस्रो डोजको रुपमा लगाउने तयारी रहेको स्वास्थ्य कार्यालय बागलुङका प्रमुख सुरज गुरौंले जानकारी दिए ।
पहिलो पटक आएको खोप स्वास्थ्यकर्मी, सुरक्षकर्मी लगायतलाई दुई डोज नै कोभिशिल्ड लगाइए पनि ६५ वर्ष माथिका जेष्ठ नागरिकलाई खोप नआउँदा दोस्रो डोज लगाउन बाँकी रहेको गुरौले बताए । पहिलो फ्रण्टलाईनमा खटिनेले दुबै डोज लगाउन भ्याउनुभयो गुरौले भने,–‘दोस्रो चरणमा आएको खोप जेष्ठ नागरिकका लागि लगाएका थियौं । त्यो दोस्रो डोज लगाउन सकिएको छैन । अहिले केहीमात्रमा कोभिशिल्ड खोप आयातगर्ने र नपुगेकालाई सोही स्ट्राजेनेका खोप लगाउने तयारी छ ।’
असोज सम्म सबै नागरिकलाई खोप
असोज महिनासम्म सबै नागरिकलाई खोप लगाउने गरी स्वास्थ्य मन्त्रालयले जानकारी गराएको र जिल्लामा पनि खोप आएमा सबै नागरिक समक्ष पु¥याउने लक्ष्य रेहको गुरौले बताए । जिल्लामा खोप केन्द्र व्यवस्थित नभएको र पहुँचका आधारमा लक्षित वर्ग भन्दा बाहिरकाले पनि खोप लगाएको गुनासो आएको थियो ।
स्वास्थ्य कार्यालयले सम्बन्धित स्थानीय तहलाई जिम्मा लगाउने र स्थानीय तहले लक्षित समुहलाई आवश्यक व्यवस्थापन गरी खोप लगाएको छ । खोप केन्द्रमा अनावश्यक भिडभाड भएकोप्रति पनि सर्वसाधारणको गुनासो रहेको थियो । अबको केही समयमा सबै नागरिकले खोप पाउने हुँदा आम नागरिकलाई अनावश्यक रुपमा स्वास्थ्यकर्मीलाई दबाव दिएर पहुँचका आधारमा खोप नलिनका समेत आग्रह गरिएको बताए । १८ वर्ष देखि माथिका सबै नागरिकका लागि खोप लगाउने कार्यक्रम रहेको हुँदा सबै नागरिकलाई पालैपालो सरकारले खोप प्रदान गर्ने बताएको छ ।
जिल्लामा १० वटै स्थानीय तहका ७० बढि खोप केन्द्रबाट खोप सञ्चालन गर्दै आएको छ । स्वास्थ्य कार्यालयले निरन्तरको वर्षातका कारण विभिन्न स्थानमा सडक अवरुद्ध हुँदा समेत सबै खोप केन्द्रमा खोप पु¥याउँदै आएको छ । खोप सुपरभाईजर खत्रीका अनुसार खोपको कोल्डचेन व्यवस्थापन गर्नुपर्ने हुँदा खोप केन्द्रसम्म सप्लाई गर्नका लागि कठिनाई भएको बताए । खत्रीका अनुसार अहिले सवै स्वास्थ्य संस्था र कोल्डचेन सेन्टरमा खोपलाई व्यवस्थापन गरिएको छ ।
मापदण्ड नतोकिएपछि खोप लगाउन स्थगित
बागलुङमा जारी रहेको कोभिड–१९ विरुद्धको खोप अभियान स्थगन भएको छ । मन्त्रालयबाट खोपको लागि लक्षित वर्ग नतोकेको कारण खोप मन्त्रालयको निर्देशन नआएसम्मको लागि स्थगित गरिएको स्वास्थ्य कार्यालय बागलुङका खोप सुपरभाईजर राजु खत्रीले जानकारी दिएका छन् । हाल नेपाल सरकारले निर्देशन दिएको लक्षित वर्गलाई करिब–करिब खोप लगाई सकिएको उनले बताए । हाल नेपाल सरकारले तोकेको लक्षित वर्गका कोहि छुटेका व्यक्ति आएमा खोप लगाईने उनले जानकारी दिए ।
नेपाल सरकारले लक्षित गरेका करिब करिब सबैले खोप लिएको र अर्को लक्षित वर्ग नेपाल सरकारले तोकी नसकेकाले खोप लगाउन नसकिएको उनले बताए । खत्री भन्छन्, ‘नेपाल सरकारले तोकेको प्रोटोेकल अनुसार प्रायः ठाउँमा कोरोना विरुद्धका खोपहरु लगाई सकिईएको छ । केहि बाँकी रहेका ठाउँमा खोप अभियान निरन्तर चलिरहेको छ । हामीसंग अहिले करिब १४ हजार डोज बाँकी रहेको छ । तर, नेपाल सरकारले अब बाँकी रहेको कोभिड खोप कुन वर्गलाई दिने भनेर निर्णय गरिसकेको छैन । अब नेपाल सरकारले कुन वर्गलाई खोप दिने हो । सो प्रोटोकल नदिएसम्म खोप लगाउन सकिने अवस्था छैन ।’
नेपाल सरकारबाट नयाँ लक्षित वर्ग तोकिएको खण्डमा पुनः खोप सुचारु हुने खत्रीले जानाकारी दिए । स्वास्थ्य कार्यालय बागलुङसंग अहिले करिब १४ हजार डोज खोप बाँकी रहेको छ । बागलुङ नगरपालिकाको बलेवा क्षेत्रका केहि स्थानमा कोरोना खोप लगाउन बाँकी रहेकाले उक्त स्थानमा खोप लगाउने कार्यक्रम चलिरहेको छ । जिल्लाका पश्चिम क्षेत्रका केहि भेगमा पनि कोरोना खोप अभियान चलिरहेको स्वास्थ्य कार्यालय बागलुङले जानकारी दिएको छ ।
यता जिल्ला प्रशासन कार्यालय बागलुङले भने आफै निर्णय गरेर लक्षित वर्ग तोक्न नमिल्ने बताएको छ । सहायक प्रमुख जिल्ला अधिकारी दिपक पौडेलले मुक्तिक्षेत्र दैनिकसंग कुरा गर्दै कुन वर्गलाई खोप दिने भनेर निर्णय गर्ने अधिकार जिल्ला प्रशासन कार्यालयलाई अधिकार नभएको बताएका छन् । स्वास्थ्य मन्त्रालयले यस विषयमा प्राटोकल बनाउने र सो अनुरुप स्वास्थ्य कार्यालयले काम गर्ने उनले बताए ।
उनले भने,‘जिल्लामा अहिले पर्याप्त मात्रामा खोप रहेको भए पनि आफै निर्णय गरेर लक्षित वर्ग तोक्ने अधिकार जिल्ला प्रशासन कार्यालयलाई रहेको छैन। ’ तथापी सो विषयमा स्वास्थ्य मन्त्रालय र प्रदेश स्वास्थ्य निर्देशानलय मा सहजीकरण गर्न सकिने पौडेलले बताए । ‘हामी आफैले निर्णय गर्ने अधिकार नभएकोले स्वास्थ्य मन्त्रालयको निर्णय बधबारसम्मलाई कुर्छौं, बुधबारसम्म पनि कुल वर्गलाई खोप दिने निश्चित नभएको खण्डमा हामी आफै मन्त्रालयसंग कुरा गरेर सहजीकरण गछौँँ,’ उनले भने ।
यो बिषयमा तपाईको प्रतिकृया