स्थापना दिवसमा आश्रमका लागि स्वास्थ्य सुरक्षा सामाग्री

जिल्लामा क्रियाशिल स्वास्थ्यकर्मीहरुको साझा संस्थाको रुपमा रहेको नेपाल स्वास्थ्य प्राविधिक संघ (पान) बागलुङले आफ्नो स्थापना दिवसको अवसरमा मानवसेवा आश्रमका लागि स्वास्थ्य सुरक्षा सामाग्री प्रदान गरिएको छ । संघको ४३ औं स्थापना दिवसको अवसरमा एक कार्यक्रमको आयोजना गरी आश्रमका लागि आवश्यक स्वास्थ्य सुरक्षा सामाग्री हस्तान्तरण गरिएको हो ।
सवैको सहयोगमा संचालन भएको आश्रममा आश्रीत रहेका नागरिकलाई पनि कोरोनाको जोखिम रहेको हुँदा यसमा केही राहत पुगोस भन्ने उद्देश्यले ५ सय थान मास्क सहित अन्य आवश्यक स्वास्थ्य सुरक्षा सामाग्री आश्रमका लागि हस्तान्तरण गरिएको संघले जनाएको छ ।
हस्तान्तरण कार्यक्रममा बोल्दै नेपाल स्वास्थ्य प्राविधिकि संघ (पान)का केन्द्रीय उपाध्यक्ष रामप्रसाद खनालले कोरोना महामारीको जोखिममा पनि आफ्नो सेवामा निरन्तर लाग्ने सवै स्वास्थ्यकर्मीको हक हितका लागि संघ सधै अग्रसर रहेको बताए । उनले स्वास्थ्यकर्मीले संकटको बेला देखाएको सदासयतालाई सरकारले उचित सम्मान गर्नुपर्ने बताए ।
कार्यक्रममा निजामती कर्मचारीहरुको आधिकारीक ट्रेड युनियन बागलुङका अध्यक्ष तेजप्रसाद शर्मा र स्वास्थ्य प्राविधिक संघका केन्द्रिय सचिव डिल्ली प्रसाद आचार्यले महामारीका बेला जनताको सेवामा अहोरात्र खट्ने स्वास्थ्यकर्मीलाई सबैको साथ र सहयोगको आवश्यक रहेको बताए ।
संघले हरेक वर्ष यस्तै सामाजिक काम गरेर आफ्नो स्थापना दिवस मनाउँदै आएको छ । कार्यक्रममा स्वास्थ्य प्राविधिक संघ बागलुङका अध्यक्ष सोमराज पाण्डेयको अध्यक्षता उपाध्यक्ष ऋषिराम शर्माको स्वागत र सचिव विष्णुनाथ सापकोटाको संचालनमा सम्पन्न भएको थियो ।