बागलुङमा मंगलबार एक सय ३० जनामा कोरोना संक्रमण पुष्टि भएको छ । धौलागिरि अस्पतालको पिसिआर परीक्षणमा बागलुङ नगरपालिका, काठेखोला गाउँपालिका, तमानखोला गाउँपालिका र जैमिनी नगरपालिकाका गरेर एक सय ३० जनामा कोरोना संक्रमण पुष्टि भएको स्वास्थ्य कार्यालयले जनाएको छ ।
स्वास्थ्य कार्यालय बागलुङका कोभिड स्रोतव्यक्ति देवप्रकाश घिमिरेका अनुसार धौलागिरि अस्पतालले संकलन गरेको ४३ जनाको स्वाबमध्ये ३३ जना, बागलुङ नगरपालिकाले संकलन गरेको ३८ जनाको मध्ये २६ जनामा ,काठेखोला गाउँपालिकाले संकलन गरेको १३ जनाको मध्ये ८ जनामा कोरोना संक्रमण पुष्टि भएको छ ।
त्यस्तै, तमानखोला गाउँपालिकाले संकलन गरेको ४६ जनाको मध्ये ३३ जना र जैमिनी नगरपालिकाले संकलन गरेको ६२ जनाको मध्ये ३० जनामा कोरोना संक्रमण पुष्टि भएको घिमिरेले जानकारी दिए ।
यस्तै, धौलागिरी अस्पतालमा उपचाररत ७९ वर्षीय पुरुष र बडिगाड गाउँपालिका–४ की ७७ वर्षीया महिलाको कोरोनाबाट मृत्यु भएको स्वास्थ्य कार्यालय बागलुङका कोभिड स्रोतव्यक्ति देवप्रकाश घिमिरेले बताएका छन् । त्यस्तै, जिल्लाको गल्कोट नगरपालिका–१ का ७८ वर्षीय पुरुषको पनि कोरोना संक्रमणका कारण मृत्यु भएको छ । त्यसैगरी, बागलुङ नगरपालिका ७ का ५४ वर्षीय पुरुषको पनि कोरोनाका कारण मृत्यु भएको छ ।
जिल्लाको ढोरपाटन नगरपालिकामा पनि कोरोना संक्रमणका कारण एक जनाको मृत्यु भएको छ । ढोरपाटन नगरपालिका –५ की २२ वर्षीया महिलाको पनि सोमबार राति मृत्यु भएको परिवार स्रोतले जनाएको छ । योसंगै बागलुङ जिल्लाको कोरोना संक्रमणका कारण मृत्यु हुनेको संख्याको २९ पुगेको छ । गण्डकी प्रदेश सरकारको स्वास्थ्य निर्देशनालयले ताराखोलाको एक युवाको पोखराको मणिपालमा मृत्यु भएको उल्लेख गरेको छ ।
यो बिषयमा तपाईको प्रतिकृया