बागलुङमा खोप लगाए दुई जना सहित थप १५ जनामा कोरोना संक्रमण

बागलुङ– जिल्लामा कोरोना भाईरस (कोभिड–१९) विरुद्धको खोप (कोभिड सिल) लगाएका दुई जनामा कोरोना संक्रमण देखिएको छ । पहिलो चरण र दोस्रो चरणको दुबै खोप लगाएका जिल्लाको बागलुङ नगरपालिकाका दुई स्वास्थ्यकर्मीलाई कोरोना संक्रमण देखिएको स्वास्थ्य कार्यालय बागलुङका कोभिड फोकल पर्सन देवप्रकाश घिमिरेले जानकारी दिए । संक्रमित मध्ये २३ र २६ वर्षका महिला रहेका छन । दुबै स्वास्थ्यकर्मी धौलागिरी अस्पतालको आईशोलेशनमा काम गर्ने रहेको घिमिरेले जानकारी दिए ।
मंगलबार नै जिल्लामा अन्य १३ जनामा कोरोना संक्रमण पुष्टी भएको छ । ति मध्ये ४ जना जिल्ला प्रहरी कार्यालय बागलुङको हिरासतमा रहेका बन्दी रहेको छन ।
त्यसैगरी काठेखोला गाउँपालिका– ८ का एक जनामा एन्टिजेन्ट परिक्षण गर्दा पोजेटिभ देखिएको छ भने बाँकी अन्य विद्यालयका शिक्षक, खेलाडी,र व्यवसायी रहेका छन । मंगलबार संक्रमित मध्ये ६ जना महिला रहेका छन भने अन्य पुरुष रहेका छन ।
संक्रमितहरुको ठेगाना अन्यत्र भए पनि सदरमुकाममा बस्दै आएकाहरु बढि भएको घिमिरेले जानकारी दिए । उनीहरुमध्ये अहिलेसम्म ताराखोला कोभिड अस्पतालमा १ जना, काठेखोला गाउँपालिकाको आईशोलेशनमा १ जना, धौलागिरि अस्पतालमा ३ जना गरी ५ जना आइसोलेसनमा छन् । बाँकी सबै होम आईशोलेनमा रहेको स्वास्थ्य कार्यालयले जनाएको छ । पछिल्लो समय संक्रमितको संख्या बढेपछि जोखिम बढेको छ ।
सहरी क्षेत्रमा लकडाउनको अबस्था आएपनि बागलुङमा भने बिद्यालय मात्रै बन्द छन् । यातायात, बैंक तथा वित्तिय संस्था र बजार खुलेका कारण बागलुङ बजारमा भिडभाड भने हटेको छैन । प्रशासनले स्वास्थ्यका मापदण्ड अनिवार्य पालना गर्न आग्रह गरेपनि केही व्यक्तिहरु खुलेयाम हिँडिरेका कारण झनै जोखिमको खतरा बढेको व्यवसायी गणेश लम्साल बताउँछन । जिल्लाका अन्य स्थानिय तहले पनि अर्को सूचना जारी नहुने बेला सम्मका लागि विद्यालयहरु बन्द गर्ने घोषणा गरेका छन । मंगलबार ढोरपाटन नगरपालिका, बरेङ गाउँपालिका र बडिगाड गाउँपालिकाले विद्यालय बन्दको घोषणा गरेका छन । यस अघि जिल्लाको जैमिनी नगरपालिका र बागलुङ नगरपालिकाले पनि विद्यालय बन्द गर्ने निर्णय गरेका थिए ।
दैनिक रूपमा कोरोना संक्रमितको संख्या बढ्न थालेसँगै समुदायमा कोरोना नफैलियोस र आम नागरिक घरमै सुरक्षित रहन हरेक स्थानिय तहले आग्रह गरेका छन । समुदायमा अनावश्यक भिडभाड नगर्ने, घर बाहिर निस्किदा माक्सको प्रयोग गर्ने,सामाजिक दुरी कायम गरी व्यावसाय गर्न हरेक स्थानिय तहले आग्रह गरेका छन ।
जिल्लामा हाल सम्म १ हजार १ सय ५० जना कोरोना संक्रमण भएका छन । उनिहरु मध्ये १ हजार ५१ जना निको भएर घर फकिएको छन भने हाल ८४ जना आईशोलेशनमा रहेको स्वास्थ्य कार्यालय बागलुङले जनाएको छ । जिल्लामा कोरोना कै कारण हाल सम्म ११ जनाको मृत्यु भएको छ ।