नेपाल महिला संघ बागलुङले बैतडी जिल्लाको दोगडाकेदार गाउँपालिकाका —७ चडेपानीकी १७ वर्षीया किशोरी भागीरथी भट्ट बलात्कारको घटनाको अपराधीलाई तत्काल पक्राउ गरी कारवाहीको माग गरेको छ । उक्त घटनाले सिंगो मानव जगतलाई कलकिंत पार्ने काम गरेको भन्दै महिला संघले घटनाको घोर निन्दा र भ्रत्सना समेत गरेको छ ।
नेपाल महिला संघले आईतबार नेपाली काँग्रेस बागलुङको पार्टी कार्यालयमा पत्रकार भेटघाट गरी विगतका दिनमा निर्मला पन्त, सम्झना विक, गुलसवा खातुन लगायतका थुप्रै चेलीहरु बलात्कारको शिकार भएको तर सरकारी तवरबाटै घटनामा संलग्नलाई कार्वाही गर्नुको सट्टा पद, पोजिसन र पावरको आधारमा अपराधलाई ढाकछोप पारी घटनाका अपराधीहरुको संरक्षणमा लागि परेको भन्दै अहिलको घटनामा त्यस्तो अवस्था सिर्जना हुन नदिन माग गरेको छ ।
पत्रकार भेटघाट कार्यक्रममा सार्वजनिक प्रेस विज्ञप्तिमा बागलुङकी रुपा गौतमको हत्याको हत्यारा अहिलेसम्म पनि पत्ता लगाउन नसक्ने र कारवाही नहुने कुराले लज्जाबोध भएको बताएको उल्लेख छ । समाजमा हुने जघन्य अपराधका घटनाका दोषीलाई कार्वाही गर्नुपर्ने ठाउँमा मुलुकको नेत्तृत्व गरेको पार्टी आन्तरिक कलह तथा कुर्सीका लागि लडिरहेको र झगडाले नागरिकको स्वास्थ्य, शिक्षा र रोजगारीका कुरा ओझेलमा परेको बताइएको हो ।
नेपाल महिला संघ बागलुङकी अध्यक्ष शकुन्तला शर्माको अध्यक्षता, सचिव उषा पौडेलको सञ्चालन तथा संघकी सल्लाहकार खड्ककुमारी खड्काको धन्यवाद मन्तव्यमा कार्यक्रम सम्पन्न भएको थियो ।
यो बिषयमा तपाईको प्रतिकृया